Året 2005 - nokre høgdepunkt

Vinterlydfestivalen Foto: Øystein Sanne Professor Aage Kvalbein deltar på Fag-pedagogisk dag 2006 Foto: Colin©Eick Gjermund Larsen Nils E Bjerkestrand

Januar

Vinterlydfestivalen vert lansert med tematikken ”…på sporet av 1920-tallet og det eksperimenterende USA”. I løpet av 5 vinterdagar inviterer Norges musikkhøgskole til eit djupdykk i vår nære fortids og eiga samtids musikk. 180 studentar og lærarar deltek i festivalen sine ni konsertar.

Februar

Året er prega av ombygging og tilbygg på studiestad Majorstua. Tilbygget ved nordfløyen reiser seg, og det er ombygging av deler av u-etg, 1., 2. og 3. etasje i det eksisterande bygget. Det store fagbiblioteket vert førebels flytta til studiestad Carl Berner, for sidan å opnast i nye lokale ved byrjinga av 2006.

Mars

Verdsstjerna og tidlegmusikkeksperten Emma Kirkby (sopran) gjestar musikkhøgskulen i samarbeid med Oslo Internasjonale Kirkemusikkfestival og held meisterklassar.

Gustav Mahler sin 8. symfoni vert framført 17. og 18. mars i Oslo Konserthus, under leiing av den finske dirigenten Leif Segerstam. Samarbeidspartnarar er musikkhøgskulen, Kringkastingsorkestret og Oslo-Filharmonien, ved sidan av Ensemble 96 og fleire barnekor. Åtte internasjonale songsolistar toppar det heile. Symfonien vert framført i Oslo Konserthus for to fulle hus med over 500 musikarar og songarar på scena.

April

Diplomstudent og hornist Stefan Jón Bernharsson frå Island vinn årets ConocoPhillips musikkstipend under eit større arrangement på musikkhøgskulen.

Mai

Japans mest kjende studentmusikkfestival, Kyoto International Music Students Festival, har særskilt fokus på Noreg. Fire musikkstudentar frå Noreg er inviterte til denne festivalen, i selskap med andre studentar frå 10 av verdas aller fremste musikkakademi. Norges musikkhøgskole stiller med festivalens solist, dirigent, konsertmeister og komponist.

Juni

Ny styringsstruktur vert vedteken av Styret, med rektor, prorektor og tre styrande utval i den faglege leiinga — med verknad frå 1.1.2006.

Juli

Bachelorstudent på hardingfele Gjermund Larsen får Kongepokalen under årets Landskappleik.

August

Amanuensis og pianist Lars Haugbro forsvarar 9. august sitt doktorarbeid “Tempo Fluctuations in the Performance of Joseph Haydn’s Keyboard Sonata in F Major” ved Cornell University i USA.

Stipendiat og organist Halgeir Schiager gjev ut sin 4. CD i ei serie med musikk av den tsjekkiske komponisten Petr Eben.

September

Professor og cellist Aage Kvalbein gjev ut albumet ”Ten Norwegian Short Stories” med eit knippe verk skrivne for Kvalbein av ti norske komponistar.

Festivalen Ung Nordisk Musik 2005 går av stabelen i Helsinki. Frå Noreg har sju norske komponistar komme gjennom juryens nålauga, fire av dei er studentar ved musikkhøgskulen.

Pandit Shivkumar Sharma - den indiske santoor-meisteren - gjestar musikkhøgskulen for å læra musikkstudentane løyndomane i indisk musikk og rytmer gjennom ei prosjektveke. Pandit Shivkumar Sharma er i dag ein av den klassiske indiske musikkens store meistrar.

Oktober

Den amerikanske saksofonisten Sonny Simmons gjestar musikkhøgskulen med meisterklassar. Sonny Simmons vert gjerne omtala som ein ”levande legende”. Han har djupe røter i den amerikanske jazzen og vert rekna som ein av dei mest betydningsfulle fri-jazzsaksofonistar frå 60-talet.

Mastergradsstudent og sopran Ingeborg Dalheim vinn publikumsprisen i den prestisjetunge songkonkurransen VIe Concours de Chant Baroque de Chimay (Belgia).

Det vert halde eit internasjonalt seminar med foredrag og meisterklassar i samarbeid med Ultima-festivalen. Vokalsekstetten Nordic Voices står i fokus. Til grunn for prosjektet er professor Lasse Thoresens forskingsprosjekt Concrescence, som har som utgangspunkt å spreia kunnskap om eksisterande vokale tradisjonar. Forskingsprosjektet skal òg skapa nye musikkuttrykk mellom ein kombinasjon av den klassiske vestlege songteknikk med mongolsk overtonesong (”difonisk song”) og norsk kveding.

Professor Nils E. Bjerkestrand gjev ut den musikkvitskaplege teoriboka ”Fra Debussys fødsel til Schönbergs død. Om veiskiller i komposisjonshistorien”.

I regi av Nordplus-nettverket vert det arrangert eit fem dagar langt orgelseminar med 12 nordiske studentar og lærarane deira i Kongsberg. Byen har Nordens største restaurerte barokkorgel, bygt i 1765 av tyske Gottfried Heinrich Gloger. Instrumentet er i fokus, med musikk frå den Nordtyske tradisjonen.

November

Mastergradstudent og dirigent Anine Kruse får prisen som beste dirigent under 15th International festival of Advent and Christmas Music i Praha, Tsjekkia i ein konkurranse med 56 kor frå heile verda. Kruse deltek med koret Bærum Vokalensemble.

Professor og pianist Einar Steen-Nøkleberg gjev ut ein CD med verdspremiere av Thomas D. A. Tellefsens to klaverkonsertar saman med Trondheim Symfoniorkester og dirigent Terje Mikkelsen.

På Parkteatret Scene på Grünerløkka set 50 studentar og lærarar frå jazz- og folkemusikkmiljøet kvarandre i stemne i rame av konserten ”Hardkår”. Noregs største studiemiljø innanfor jazz/improvisasjon og folkemusikk byr på eit program som spenner frå lydarslåttar til hardcore frijazz.

Desember

Mastergradstudentane Morten Qvenild (piano), Roger Arntzen (kontrabass) og Pål Hausken (trommer) i jazztrioen ”in the country” vert plasserte på det musikalske kartet med strålande meldingar av sitt album ”this was the pace of my heartbeat ”i jazzmagasin og aviser i Europa og USA. Av amerikanske Jazztimes vert albumet kåra til ei av dei 50 beste jazzutgjevingane i 2005.