Lanseringskonkurransen INTRO-folk 2009

Vinnaren får eit skreddarsydd lanseringsprogram i 2010 og 2011 som er sett saman av Rikskonsertane, Norsk Folkemusikk- og Danselag og Landslaget for Spelemenn. Programmet vil innehalde konsertar på lanseringsfestivalane til INTRO-folk og dessutan turné i Noreg i regi av Rikskonsertane. 

Opnar dører

Lanseringskonkurransen til INTRO-folk har tidlegare blitt arrangert i 2005 og i 2007. I 2005 vann folkemusikkgruppa Majorstuen, og i 2007 var det felespelaren og songaren Benedicte Maurseth som blei kåra til Årets unge folkemusikar. Ho er no inne i lanseringsprogrammet sitt.
– For meg har det vore før og etter INTRO-folk, seier Benedicte.
– No kan eg for første gong leve hundre prosent av musikken, og fordi eg vann som solist, får eg òg ei rekkje solistoppdrag i både inn- og utland. Dessutan har tittelen Årets unge folkemusikar opna dører for meg og gjort det lettare å få gjennomslag for større prosjekt.
Neste år skal Benedicte mellom anna komponere til og spele i eit samarbeidsprosjekt mellom Rikskonsertane og Det Norske Teatret.

Andre moglege lanseringstiltak

I tillegg til konsertar og turné kan Årets unge folkemusikar få tilbod om å utvikle eit skolekonsertprogram i samarbeid med ein produsent og gjennomføre ein skolekonsertturné for Rikskonsertane. Artisten vil òg få hjelp til profileringstiltak og marknadsføring. Dessutan kan det bli aktuelt med promotering mot utlandet. Det er vidare mogleg at vinnaren vil få eit bestillingsverk og produsenthjelp.

INTRO-folk

Føremålet med INTRO-folk er å styrkje norsk og samisk folkemusikk. Med Årets unge folkemusikar ønskjer vi å skape ein arena der utvalde folkemusikarar får høve til å utvikle seg som kunstnarar og få erfaring i formidling av folkemusikk på høgt nivå. Gjennom semifinalar, finale og lansering på dei fremste folkemusikkfestivalane våre får eit breitt publikum sjansen til å bli betre kjent med denne musikkutøvaren. Det skal òg seiast at berre det å vere med i konkurransen som semifinalist eller finalist vil lansere den enkelte musikaren for eit stort publikum.

Vi oppfordrar unge norske og samiske folkemusikarar til å søkje om å bli med i konkurransen INTRO-folk 2009.

Søknadsfristen er 1. oktober 2008.

For meir informasjon

www.nfd.no eller www.rikskonsertane.no

Kontaktperson

Eivind Kaasin, prosjektmedarbeidar i Norsk Folkemusikk- og Danselag
Tlf: 22 00 56 94, mobil: 47 30 38 47, e-post: eivind@folkogdans.no